quarta-feira, 15 de outubro de 2014

Dalle a lingua con Onda Cero Radio e o Concello de Pontevedra

Máis de 100 alumnos da nosa escola  participaron hoxe no programa "Dalle a Lingua" de Onda Cero Radio,  patrocinado pola Concellaría de Normalización Lingüística do Concello de Pontevedra.

 A estructura do programa  comezou  cos xogos de sortes que son aquelas letras con rima que se utilizan para escoller nos xogos dos rapaces,  e rematous con frases da campaña de oralidade do curso anterior (13-14).  E no medio deles foron tamén os seguintes temas:
- Árbores do parque de  Campolongo
- Herbas aromáticas e mediciñais
- Aves galegas en perigo de extinción
- Receitas con froitos ou produtos  da horta galega

As emisións de radio que grabamos hoxe serán  emitidas do 20 ao 31 deste mes de outubro (de luns a venres) en ONDA CERO radio. 
Frecuencia: 103.6 FM 

Ás  11:55 h   da mañá.

Clica na imaxe para ver as fotos.

NOTA. Unha vez emitidos os programas mandarán a ligazón dos audios para poder escoitalos en calquera momento.

VII Xornadas de materiales e recursos educativos


Máis información (incluído o boletín de inscripción)

domingo, 12 de outubro de 2014

ENTREGA DO PREMIO LEIXAPRÉN 2014 NO IES FÉLIX MURIEL


Ver o premio na páxina da CGEDNL

 Ver o premio 2013 (Gómez Noya)

1ª Xuntanza de coordinadoras comarcais



Puntos salientables da xuntanza: 

- Lémbrase a todos a conveniencia de renovar as ADSCRICIÓN das persoas dos equipos, que aínda non o están, para poder recibir toda a información da Coordinadora, CGENDL, 

-  Comentouse a importancia de que a revista "Ollos de aula" chegase a todas as familias, profesorado...( se se pode mediante email, e se non se pode, fotocopia en branco e negro, son 2 folios polas 2 caras, pero vale a pena)   http://www.coordinadoraendl.org/limiar.php?pax=ollosdeaula/ollosdeaula.html e tamén se houbese polo menos un exemplar nun sitio ben visible do centro, expositor... para coñecela. 
Tamén se propuxo que se puidesen incluír nas mochilas viaxeiras que se envían á casa e se se vos ocorren outros xeitos de espallala, comentámolos xa que nos poden favorecer ao resto.

En canto á revista "a letra miúda",http://coordinadoraendl.org/aletramiuda/index.php , sería interesante que chegase dixitalmente ao profesorado.

- Falouse de seguir difundindo os RECURSOS dos que dispón a Coordinadora, entre eles tamén o de Xogos Populares (Enredos) .  

 Séguese pedindo máis participación no PREMIO LEIXAPRÉN  (3º trimestre). Ver Premio Leixaprén 2013    -  Leixaprén 2014

- Están aí as XORNADAS:   A Coordinadora Galega de ENDL coorganiza xunto con Nova Escola Galega as VII Xornadas de Materiais e Recursos Didácticos: Experiencias e Recursos para a normalización lingüística,  (ver neste blogue)  que se van celebrar os días 24 e 25 de outubro na Facultade de Ciencias da Educación de Santiago de Compostela.Trátase dunha actividade que ten a homologación da Consellería de Educación por un total de 10h para as persoas asistentes. Á súa vez, quen teña interese en recibir a homologación de relatores deben matricularse no curso a través da páxina da Nova Escola Galega (acceso á inscrición). No caso dos/as docentes aos que non lles interese o título pero si mostrar materiais, só teñen que inscribir a experiencia pero non pagar a matrícula. Terán un xustificante de participación pero non será homologado pola Consellería. En calquera caso, debedes anotarvos antes do día 1 de outubro. Para inscribirse, tedes que cubrir o boletín de inscrición e enviar por correo-e a neg@mundo-r.com ou por correo postal a R/ das Hedras, 4-2ºO. 15895 Ames (A Coruña). Tamén por fax ao 981562577. Acompañarase a inscrición co xustificante bancario. Matrícula ata o 21 de outubro.

- Parece importante difundir ao máximo tamén O PORTAL DAS PALABRAS http://www.portaldaspalabras.gal/  

- Estase elaborando a campaña PRESUME DO GALEGO, onde de entrada falouse de gravar durante un minuto ós nenos galego-falantes (de entrada en audio). (Enviarase máis detalles cando saia)

Por suposto a CGEDNL está aberta a todas as colaboracións que se aporten.

Recursos prácticos para o inicio de curso  .  Ver calendarios   +  Asistencia ás Xornadas

Saúdos Normalizadores

Coordinador da Comarca de Pontevedra

quinta-feira, 9 de outubro de 2014

Ollos de Áula - Nº 16 - Revista para as familias

Clicando na imaxe poderás atopar os seguintes artigos:

- Como se crea o hábito nos nenos?
- Nova lei de educación. Os novos cambios no curso.
- Que é a aprendizaxe por proxectos?
- Un menú rico para a lingua
- Libros e recunchos recomendados.
.......

sábado, 4 de outubro de 2014

Refraneiro do mes de outubro

Primeiro vótalle unha ollada a estas datas, e logo le os refrans específicos do mes de outubro,  porque tamén hai moitos sobre o outono.


San Francisco, 4 de outubro.  

Os Remedios, o segundo domingo de outubro;

O Pilar, 12 de outubro.

San Lucas, 18 de outubro

San Xudas e San Simón, 28 de outubro.

San Quintín, 31 de outubro.



- Por San Francisco bota o liño mourisco, se o botas en San Simón nin da estopa nin estopón.
- Por san Francisco, risco, risco. Por san Lucas alza o boi da suca, mata o porco e tapa a cuba.
 -  En san Francisco trae a vela, en San Xosé lévaa.

- Pasados os Remedios e san Roque, xa non hai sesta nin merendotes.

- Polo Pilar, os nabos na terra e o viño a envasar.

- Polo san Lucas mata o teu porco e barra a túa cuba / as túas cubas.
- Polo san Lucas saben ben as uvas.
- Polo san Lucas solta os bois, mata os porcos e tapa as cubas.

- Por san Xudas e san Simón, collidas as uvas son

- Polo san Simón proba o viño, e o porco polo san Martiño.
- Polo san Simón, áncoras ó fondón.
- Por san Simón a xeira do cogordón.
- Por san Simón cada moneda vale un doblón.
- Por san Simón e san Xudas, collidas as uvas.
- Por san Simón e san Xudas, mata o teu porco e atesta as túas cubas.
- Por san Simón o néspero se repón.
- Por san Simón, aperta o baldón.
- Por San Simón, camiñar si, navegar non.
- A verdura de San Simón dá pro (para o) amo e mais pro (para o) ladrón.
- Áncoras ó fondo, que chega San Simón.
- As avenidas de San Simón, antes ou despois sonadas son.
- As enchentes de San Simón sonadas son, ou antes ou despois enchen o carro e mais os bois.

- Por san Martiño e san Xudas, piñeiriña das túas uvas.

- Por san Quintín castañas ó rolín.

- A lúa de outubro a sete cubre, e se chove, nove.
- A lúa de Outubro sete lúas cobre, e se chove, cobre nove.
- En outubro, a terra esterca e cobre.
- En outubro, non molesta o lume.
- Outubro viñateiro, pai de bo xaneiro.

Nota:

 - Baldón ou bandón é o tapón de cortiza ou madeira co que se tapa o burato da tapa superior dos bocois.
-  "Barrar as cubas" é tapar calquera greta ou abertura que poida ter a cuba para asegurar a súa hermeticidade. Facíase con lama ou pez.

Neste mes entrarían tamén moitos dos refráns que hai sobre o outono, que tanto pode ser chamado estación ou mes  do ano.

Ver tamén curiosidades de outubro.